Estes dous parques formaban parte do expediente conxunto PEOL-913 AC (no que tamén se incluían os P.E. Ventoburgo, Sistesas, Xestiloi e infraestruturas de evacuación asociadas), tramitado e sacado a exposición pública no verán de 2025. “Coa resolución desfavorable emitida pola administración, certifícase que os proxectos de Agratrina e Agromaces non son aptos dende o punto de vista medioambiental e, polo tanto, non serán autorizados nin sairán adiante”, explican.
Dende Xuntas polo Territorio poñen en valor a loita, o traballo e o compromiso demostrados ao longo de todo o territorio que pretendían ocupar estas instalacións. Este logro é unha proba evidente da importancia de organizarse e actuar de xeito conxunto, “Queremos facer constar a importancia vital de asociarnos e, xuntas e xuntos, loitar polos nosos dereitos; só así nos serán respectados. Esta resolución demostra que a mobilización serve e que, cando o pobo se organiza, pode protexer a súa terra.”
Dende o colectivo fan un chamamento a todas as persoas comprometidas coa defensa do medio rural e do patrimonio a que se unan á asociación e participen activamente nas loitas que xa están en marcha ou que poidan xurdir no futuro, tanto na comarca como na contorna.
