A data prevista inicialmente era o 8 de marzo, pero finalmente o gañador desta edición, o Consello Regulador da Agricultura Ecolóxica de Galicia (Craega), recollerá o galardón o día 29.
O Premio Aresa, convocado pola Universidade de Santiago de Compostela e Aresa contaba, nesta edición, con 10 candidaturas e recaeu no Consello de Agricultura Ecolóxica de Galicia, polo desenvolvemento dun proxecto multisectorial e o seu destacado papel para a expansión da agricultura ecolóxica. O Craega recibirá 10.000 euros e un diploma.
Seguindo as bases do concurso, os membros do xurado prestaron especial atención a aquelas candidaturas que xerasen postos de traballo de calidade no rural, que puxesen en valor os produtos da terra, que recuperasen subsectores agrícolas e gandeiros tradicionais con potencial para desenvolverse e que buscasen innovar en produtos e métodos produtivos.
José Manuel Silva destacou as tres razóns principais polas que se decantaron por este galardoado: “Facer que a agricultura ecolóxica sexa un dos motores do desenvolvemento rural, cunha especial resposta á demanda de consumo en Galicia; defender un proxecto de control e regulación da produción de maneira multisectorial, e lograr que a agricultura ecolóxica sexa unha das causas principais para a maior implantación de mozos no mundo rural e agrario”.
As outras candidaturas eran: Asoporcel, Galo Celta, Atelier Bisqato, a Asociación de Desenvolvemento Rural Mariñas-Betanzos, o Consello Regulador da Denominación de Orixe Protexida DOP Cebreiro, Miceltia, o Sistema de deshidratación alimentado por enerxía solar para produtos agroalimentarios, a Cátedra do pan e do cereal e o Proxecto H2GZ Raising Water Para e Por Galicia.
