Os proxectos serán executados sobre montes de titularidade privada, na gran maioría en mans de comunidades, que teñen asinado un convenio de xestión coa Consellería do Medio Rural. As obras están programadas polo servizo provincial de Montes.

As actuacións na Zona Sur suman un orzamento próximo aos 127.600 euros, case o 54% do importe global, para mellorar infraestruturas de prevención en 34 montes. Así, realizaranse limpezas de cortalumes e mellora de pistas en oito montes de Folgoso do Courel, oito de Quiroga, sete de Ribas de Sil, catro de Bóveda, tres da Pobra do Brollón, un de Pantón e un de Monforte de Lemos. Está prevista tamén a construción de cortalumes no monte Costa de San Cristovo de Taboada.

O resto de actuacións na provincia levaranse a cabo en catro montes de Trabada, dous da Pontenova, un de Mondoñedo, un en Xove, sete montes do concello da Fonsagrada e un de Guitiriz.