O evento Sacra Festival 2021 combinará a música, a danza, o cinema e a gastronomía con distintas actividades nas que participarán artistas como Niño de Elche, Davide Salvado e Óliver Laxe. Terá lugar entre o 9 de xullo e o 8 de agosto en distintos municipios da provincia de Lugo.

No acto de presentación da programación, apoiado por institucións como a Xunta, a Deputación de Lugo e o Concello de Chantada, a directora artística do festival, Carlota Pérez, explicou que o evento representa “unha filosofía que vai máis aló da oferta de lecer que comprende o respecto polo medioambiente e a integración dos espazos da Ribeira Sacra“.

“Sempre tivemos unha concepción de festival de pequeno tamaño, lonxe de eventos multitudinarios, con capacidades reducidas para que o público poida gozar da contorna e os espectáculos”, sinalou. Así, desenvolveranse máis de 15 actividades que contarán coa participación de máis de dez artistas que se realizarán durante tres fins de semana en espazos singulares da Ribeira Sacra, como adegas, contornas naturais e escenarios xunto ao río.

En concreto, o Lugar de Pincelo, en Chantada, acollerá un taller de teatro, un almorzo con produtos da Ribeira Sacra e unha sesión de flamenco entre o 9 e o 11 de xullo, así como un taller cinematográfico a cargo do director de cinema Óliver Laxe entre o 5 e o 7 de agosto e un almorzo familiar en romaría o 8 de agosto.

Ademais, o parque temático dedicado aos carballos Carballolandia, en Garabelos, contará con actividades nas que participarán o bailarín Chey Xurado e a cantante Mercedes Peón o 10 de xullo. Carballolandia e as adegas Vía Romana tamén acollerán concertos de Surma, Niño de Elche e unha sesión de música electrónica o 7 de agosto.

Adicionalmente, realizaranse catas e terán lugar concertos da banda de Chantada e o cantante Davide Salvado na adega Amedo, en Chantada, o 24 de xullo.