O Concello de Taboada sumouse a outros municipios da provincia de Lugo que tratan de alixeirar o consumo de auga da traída cando non sexa “imprescindible”, neste caso debido ao baixo caudal do río Toldao.

“Estamos bastante mal”, asegura o alcalde, Ramiro Moure, quen explica que este río do que se abastecen vai “cuns niveis moi pequenos”. Por iso, o Consistorio emitiu un bando “para que se use a auga con racionalidade” para non ter que “facer ningún corte”.

No devandito bando recoméndase “que se faga un uso racional da auga e por tanto evitar a rega, o lavado de coches ou o enchido de piscinas en casas particulares”. Atendendo a isto, preténdese evitar “cotar a subministración” por horas e, avanzou Moure, se de momento “vaise mantendo todo isto así”, a subministración podería continuar “normal”.

Finalmente, o rexedor relatou que este fin de semana un camión cisterna trasladouse a un núcleo do municipio aínda que non só foi polo efecto da seca, senón tamén “por unha avaría que houbo nunha das tubaxes” da rede de abastecemento.