Prohibidas as queimas por mor das altas temperaturas

A partir deste sábado 24 de xuño os particulares non poderán queimar restos agrícolas nin forestais. Só se permitirán aquelas que realicen os servizos de prevención debidamente planificadas e dispoñendo de medios para a súa extinción.

Lume no monte. Foto: Prensa Medio Rural

As altas temperaturas que trae o San Xoán fixeron adiantar a prohibición de queimas de restos agrícolas e forestais realizadas por particulares en Galicia co cal non se darán máis permisos e os concedidos quedarán en suspenso. A medida aplicarase a partir deste 24 de xuño, quedando excluídas desta prohibición as queimas controladas que executa o Servizo de prevención e defensa contra os incendios forestais debidamente planificadas e dispoñendo dos medios de extinción precisos.

Cómpre lembrar que o Decreto 105/2006, polo que se regulan medidas relativas á prevención de incendios forestais, á protección dos asentamentos no medio rural e á regulación de aproveitamentos e repoboacións forestais, prohibe as queimas cando as condicións meteorolóxicas poidan dificultar o seu control.

A Consellería do Medio Rural pide colaboración da cidadanía para que extreme as precaucións e denuncie calquera actividade delituosa incendiaria da que teña coñecemento, dado que desde este sábado e ata novo aviso non está permitido o uso do lume para ningunha actividade agrícola e forestal para particulares; e recorda tamén que está a disposición da cidadanía o número de teléfono gratuíto 085, ao que deben chamar en caso de detectar algún lume forestal.

DEIXAR UN COMENTARIO

Please enter your comment!
Please enter your name here