O Concello de Carballedo vén de presentar un concurso no que anima á veciñanza a inmortalizar e dar a coñecer as decoracións de Nadal que haberá estes días no exterior.
Deste xeito, animan a enviar unha fotografía nocturna realizada no territorio do concello retratando casas, edificios –fachadas, balcóns, terrazas, portas, etc–, locais comerciais, xardíns, garaxes, hórreos, palleiras… que estean engalanadas para a celebración do Nadal. As fotografías serán de boa calidade e teñen que enviarse ao correo info@concellocarballedo.es indicando o nome, apelidos e lugar da imaxe antes do 26 de decembro.
As imaxes enviadas a este enderezo electrónico subiranse ao Facebook do Concello o mércores 28 de decembro, intre a partir do cal poderán recibir ‘likes’ das usuarias e usuarios desta rede social. O prazo para as votacións será do devandito 28 de decembro ao 8 de xaneiro de 2023.
PREMIOS
Contémplanse 3 premios para as fotografías que tiveran máis reaccións de ‘Gústame’ tras o reconto final e os agasallos serán lotes de produtos gourmet valorados en 325 euros.
