As actividades comezaron o pasado día 9 de xullo e alongaranse ata o 10 de setembro, contando tamén que dentro da programación están varias actividades fixas xa no calendario chantadino: a ‘Semana de Cine’, do 15 ao 18 de agosto; a ‘Mostra de Teatro’, do 22 ao 25; e as Festas Patronais que se celebran do 26 ao 30 de agosto.
Moitas son as alternativas para público infantil e familiar que enchen o programa deste ano, dende os espectáculos teatrais e monicreques, pasando polos relacionados co circo ata chegar á música e á maxia.
Pasarán por Chantada espectáculos teatrais a cargo de El Gran Rufus, Con Ton y Son ou Anima-T; os monicreques de Pirueta Teatro; contacontos con Marcelo Dobade, José Varela e Eulali Moreno; e espectáculos de maxia con Mago Deimi, Mago Noel, Mago Lolo e Le Gran Marín.
Como cada ano tamén, haberá espazo especial para as animacións relacionadas co circo con acrobacias, malabares, espectáculos de clow e a “Gran gala do Circo” o día 21 de agosto.
ESPECTÁCULOS MUSICAIS
Ademais da cita obrigada cos concertos da Banda de Chantada, o día 29 de xullo en concerto e o 20 de agosto na intervención especial bautizada como “Colle ti a batuta” na sesión ‘Noites á luz da lúa’, hai que sumarlle outros concertos. Sebastián Pitré dará un concerto de guitarra o 22 de xullo e María do Ceo outro o 19 de agosto. Orientados a público infantil están o show de Pitusa Semifusa o 24 de xullo, o concerto de Paco Pakolas o 30 de xullo e o de Xoán Curiel o 3 de agosto.
As actuacións para público familiar serán na Praza do Cantón de Chantada ás 20:00 h. e os concertos para público adulto ás 21:30 h. Dende o Concello de Chantada lembran que a entrada é libre ata completar aforo e que se recomenda o uso de máscara.
