O Xulgado de Primeira Instancia e Instrución Nº1 de Chantada decretou a apertura de xuízo oral contra HC. V., veciño da localidade, acusado por disparar e arrastrar a unha cadela, Alma, que posteriormente faleceu. Tanto a Fiscalía como a protectora O Refuxio -que actúa como acusación– solicitan a máxima pena de 18 meses de prisión e a inhabilitación de catro anos para a tenencia de animais.
Os feitos, segundo consta nas actuacións, tiveron lugar o 30 de novembro de 2019, sobre as 11,55 horas no Lugar de Soilán en Chantada, o acusado “disparou coa súa escopeta nas patas traseiras á cadela para, con posterioridade, coller unha corda, atarlla ao pescozo e arrastrala por un camiño e un paso subterráneo”. Como consecuencia das feridas provocadas, a cadela morreu o día 3 de decembro.
Por mor dos feitos e a “indignación social” que causaron, a protectora O Refuxio iniciou unha campaña baixo o lema #NoPuedeSer, a través da cal pedían levar a cabo unha reforma do Código Penal español que endurecese as penas por delitos de malos tratos graves aos animais.
Tras tres anos de reunións con todos os grupos parlamentarios, actualmente a reforma está en tramitación no Congreso. O presidente do Refuxio, Nacho Paunero, tacha este avance e o chamada xuízo oral do acusado polos feitos ocorridos en Chantada como “motivos de satisfacción para quen protexemos aos animais abandonados e maltratados”.
