No Concello de Chantada o Día da Xuventude celebrarase na praza diante do Polideportivo Municipal, o día 31 de maio en horario de 16:00h a 21:00h. A actividade está dirixida a mozos e mozas de entre 12 e 35 anos, e contarase tamén cun espazo de construcións para nenos e nenas de 6 a 12 anos.
Durante a tarde do venres levaranse a cabo distintas actividades e obradoiros de educación non formal que teñen como obxectivo sensibilizar, entreter e formar á mocidade, así como dar a coñecer outras actividades da Dirección Xeral de Xuventude, Participación e Voluntariado. Rematarase coa actuación dunha formación ou artista local que nesta ocasión sae das escolas de música, trátase do cuarteto de saxofóns Albeiro Ardoa que ofrecerá un concerto a partir das 20:30h.
Todas as actividades son de balde e están abertas a toda a mocidade interesada, “Será unha tarde de moito ambiente en Chantada onde a mocidade será protagonista. Nesa xornada celébrase tamén un Campionato de Fútbol Sala que concentrará a moitos nenos e nenas no Polideportivo Municipal e na contorna, con este Día da Xuventude”, destaca Belén Vázquez, Concelleira de Deportes, Educación e Xuventude.
As actividades e obradoiros a desenvolver neste Día da Xuventude son os seguintes:
- Gastronomía saudable: demostración culinaria, cocteis sen alcohol
- Lecer educativo: futbolín humano, tiro con arco, espazo de construcións
- Punto informativo con información para a mocidade
- Concienciación ambiental: xogo de escape e realidade virtual
- Expresión artística: Obradoiro de arte colaborativo
- Educación en igualdade de xénero: tipos de violencia e cimentos en xogo
- Fomento das habilidades para a empregabilidade: recursos e kahoot!
