A Casa da Cultura de Chantada convida coa exposición “Pinceladas de Galicia, unha homenaxe artística ás súas trasdicións” a unha viaxe pictórica por algunhas citas importantes na tradición galega da man da pintura de Walfraga (Waldirene Silva).

A autora, nada en Minas Gerais, Brasil, no 1968, iniciouse na pintura no 1990 e desde aquela ten desenvolto exposicións en Brasil e en España. Desta banda do Atlántico, en lugares como o Centro Cultural Puerta de Toledo, o Centro Cultural Ayuntamiento de San Martín de la Vega, na Galería de Arte Arquestion de Ourense ou en Amigos da Fundación de Santiago de Compostela.

Waldirene Silva traballa o estilo académico-figurativo utilizando a técnica de óleo sobre lenzo. A Chantada trae pezas que nos presentan a Rapa das Bestas, os tradicionais entroidos de Ourense ou pinceladas do noso folclore e da nosa música.