Unha iniciativa comezou este mes coa plantación de 50.000 árbores froiteiras na Serra do Courel para mellorar o hábitat do oso pardo nesta zona. A Fundación Ouso Pardo impulsa este proxecto –LIFE Oso Courel– polo que haberá plantacións en montes comunais dos municipios lucenses de Folgoso do Courel, Quiroga e Samos.

Para a realización dos traballos, que se estenderán ata marzo de 2021, contratouse a unha decena persoas desempregadas da comarca. Estas 50.000 árbores súmanse aos 55.000 xa plantados no outono e inverno anterior. As cuadrillas de traballo están dotadas de todoterreos, remolques e ferramentas.

Desde o mes de outubro, unha máquina xa realiza os traballos de preparación do chan para garantir a boa implantación das árbores e arbustos, sen afectar á vexetación existente. As plantas proceden das sementes recollidas polos técnicos do proxecto LIFE na zona, que foron sementadas en viveiros colaboradores e unha parte das plantas foi producida no Viveiro Forestal de Vos Trollos –Bóveda, Lugo–, pertencente á Consellería de Medio Rural da Xunta de Galicia.

“Esta acción contribuirá a aumentar a dispoñibilidade de recursos para o oso e outras especies no Courel, pero ademais favorecerá a cobertura forestal, a captación de carbono e a protección do chan dos montes e a creación de emprego local”, sinala Fernando Ballesteros, coordinador do proxecto LIFE.