Un ano máis, a Asociación Boca do Monte dos Anguieiros, na parroquia de Montefurado (Quiroga) organiza un feixe de actividades para celebrar a Festa da Madalena. Contan dende a entidade organizadora que estando prevista inicialmente para os días 22-23 tiveron que pospoñela ao 29-30 de xullo por mor das eleccións xerais do pasado 23 de xullo.
Como vén sendo costume, as actividades son diversas e para todos os públicos contando cunha camiñada pola contorna, xogos infantís, unha presentación literaria, unha merenda popular, unha foliada, un campionato de bolos e os actos relixiosos na honra de María Madalena. Actividades que contan coa colaboración económica do Concello de Quiroga e a Área de Cultura da Vicepresidencia da Deputación de Lugo, neste caso a través do programa TRADIGALU de poio e difusión da música tradicional.
PROGRAMA
Para o sábado 29 está programada unha camiñada que comezará ás 9:30 h. e vai dende a entrada dos Anguieiros ata A Balsada (unha aldea abandoada) para os máis intrépidos. Aqueles que consideren que é moi dura seguirán o camiño ata a Enciñeira ou poderán desandar o camiño ata o punto de partida. O itinerario da mesma está no blog da propia asociación.
Xa pola tarde, ás 17:30 h. haberá xogos infantís como a Chave, a billarda, os bolos celtas, tirar coa corda ou xogar aos zancos. E como remate, globos de auga.
Máis tarde, ás 19:30 h. terá lugar a presentación do libro “Bendollo sempre na memoria” de Xerardo Rodríguez, autor con raíces nos Anguieiros.
E para rematar a xornada, a partir das 21:00 h. merenda popular e foliada cos grupos tradicionais “O Ventosiño” de Monforte e “Abertal” da Rúa. A presenza do grupo “O Ventosiño” é posible grazas ao programa TRADIGALU da Área de Cultura da Vicepresidencia da Deputación de Lugo.
Chegando ao domingo 30 teremos o XI Campionato de Bolos Celtas con importantes premios para homes e para mulleres con horario de comezo para as 10:00 h.
Despois, ás 12:30 h. alborada con “Abertal” e ás 13:00 h. Misa e Procesión. Sobre as 14:00 h. aperitivo popular amenizado por Abertal e entrega dos premios da rifa das festas.
