O PSOE do Folgoso do Courel cumpre cos veciños e defende os seus intereses por eso hai riba da mesa un proxecto con dotación económica para executar a residencia e centro de día do concello.

Lembran os socialistas que no 2008, gobernando eles no concello e na Xunta comprometéronse á creación e realización deste proxecto que consideran fundamental para os veciños. Un ano despois, co PP na Xunta, paralízase o plan e desde entón ata hoxe a alcaldesa do PP non fai ningunha xestión cos gobernos populares da Xunta e a Deputación para retomar o proxecto. É cando o PSOE volve á Deputación que populares e socialistas municipais solicitan iniciar os trámites para facer da residencia unha realidade e Darío Campos, presidente socialista, decide liderar o proxecto e dotalo de inversión, a petición da voceira municipal do PSOE.

Esta secuencia dos feitos faina Carmen Álvarez, voceira do PSOE en Folgoso do Courel, despois de que o presidente da Deputación presentara o proxecto e de que desde o PP provincial se arroxaran méritos na súa consecución.

Insiste Carmen Álvarez en que ter presentado o proxecto da residencia e centro de día cunha inversión do excecutivo provincial de 1,2 millóns de euros demostra que só os socialistas se interesan polas necesidades dos veciños.