Formación no Courel sobre produción de cogomelos en tronco de carballo e de castiñeiro

A iniciativa parte da Consellería do Medio Rural, a través da Axencia Galega da Calidade Alimentaria, e o curso desenvolverase entre o venres 12 e o domingo 14 de novembro na Estación científica de Folgoso do Courel.

Cogomelos en troncos. Foto: Marga M.

A Consellería do Medio Rural, a través da Axencia Galega da Calidade Alimentaria, ten previsto celebrar a semana que vén en Folgoso do Courel un curso sobre produción de cogomelos en troncos de castiñeiro e de carballo.

A iniciativa está programada entre o venres 12 de novembro e o domingo 14 na Estación científica desta localidade lucense, en horario de 9:00 a 14:00 horas e de 15:30 a 18:30 h., cun total de 20 horas lectivas.

OBXECTIVOS DO CURSO

A formación, impartida polo Centro de Formación e Experimentación Agroforestal de Guísamo, ten como obxectivo dar a coñecer esta posibilidade produtiva compatible coa explotación da madeira e co aproveitamento da castaña, dado o pouco investimento inicial preciso para introducirse no mercado dos cogomelos.

No programa contémplanse contidos sobre as distintas especies de cogomelos que se cultivan en troncos, así como sobre a produción, a colleita e a postcolleita, entre outras cuestións. O curso inclúe un taller de inoculación de shiitake e outro de inoculación de cogomelo ostra.  

A QUEN VAI DIRIXIDO?

A acción formativa está dirixida en xeral a calquera persoa vinculada profesionalmente cos sectores produtivos relacionados coa agricultura, gandaría, industria agroalimentaria e cadea forestal-madeira, así como mozos e mozas do medio rural galego e persoas con expectativas de incorporación ao sector.

PARA FORMALIZAR RESERVA E VER OUTROS CURSOS

A Consellería do Medio Rural conta cun plan de accións formativas e de transferencia para este ano 2021 que pode consultarse no seguinte enlace: https://ovmediorural.xunta.gal/gl/consultas-publicas/accions-formativas. Precisamente nesta páxina pode atoparse o referido curso e descargar as solicitudes de asistencia correspondentes. Deben remitirse cubertas ao enderezo electrónico cfea.guisamo@edu.xunta.es  e consultar calquera dúbida no teléfono o 881 881 043.

DEIXAR UN COMENTARIO

Please enter your comment!
Please enter your name here