A pouco máis de medio ano para as vindeiras eleccións municipais, parece que ningún partido político actual quere deixar pasar a oportunidade de demostrar a súa valía e sinalar a mala xestión da oposición.
Se hai uns días era Carmen Álvarez, a portavoz do PSOE do Courel quen acusaba á actual rexedora, Dolores Castro, de non preocuparse polos veciños e de anotarse tantos que non lle corresponden, agora é a alcaldesa quen non mostra reparo algún á hora de defender tanto a súa xestión como a do seu partido.
O pasado 17 de setembro, un veciño da localidade tivo que ser trasladado en helicóptero ó centro hospitalario ante o cal, Carmen Álvarez, criticou que o aparato non puidese aterrar onde o centro médico. Segundo a alcaldesa, “loxicamente no puido aterrar onde o centro médico porque non hai sitio para facelo. No Courel hai 2 sitios para que os helicópteros aterren, o campo de fútbol en Ferreirós e o cruce de parroquia preto de Piñeira“. Dende a súa opinión, o PSOE o que tiña que facer “era comezar coas obras da residencia da terceira idade e deixarse de criticar actuacións como a do helicóptero onde non teñen razón algunha”.
E é que a residencia de terceira idade que está proxectado que se constrúa no antigo colexio é outro tema polémico no concello. O PSOE reivindica que esta obra é posible grazas a xestión feita pola Deputación de Lugo mentres que a alcaldesa popular di que, “no ano 2015 cando Elena Candia era presidenta da Deputación de Lugo, fomos nós os que propuxemos o proxecto. Sen embargo, coa entrada do PSOE no goberno provincial, a obra pasou a mans de Suplusa á propia Deputación e polo tanto andar a vender que se Courel ten unha residencia é grazas a súa xestión. Eu teño claro que todo é mentira porque para cando nós votamos a favor da súa construción foron os do PSOE os que votaron en contra e agora, anos máis tarde, como o goberno da Deputación é socialista, é unha obra deles. Que se deixen de tanto falar e que se poñan xa a traballar en serio co proxecto pois soamente está asinado o convenio e debería estar rematada para o 2019. Tendo en conta que o proxecto aínda non saíu a licitación, cómprelles o tempo para tela rematada no prazo acordado”.
Dolores Castro continúa a súa resposta ante a crítica da oposición socialista engadindo que, “claro que non estou 24 horas no Concello, como calquera alcalde. Non temos obriga de estar no noso despacho todo o día. Aínda hoxe fun a unha reunión pola mañá. Ademais iso de que non vivo no Courel obrígame a aclararlle a Carmen Álvarez que ela si que non vive no Courel e que eu estou segura de que paso máis horas alí ca ela”.
Finalmente, e para rematar coa batería de respostas a súa opositora, a rexedora recalca que, “cando entrei de alcaldesa, no Courel tiñamos que andar polas fiestras buscando cobertura e pouco a pouco estamos intentando arranxar o problema. Xa instalamos 5 repetidores novos e unha nova antena no fondo de Folgoso. Estamos en continuo contacto con Telefónica para que os problemas de comunicación dos veciños cada día sexan menores. Si é certo que Ferreirós aínda ten moitos problemas de comunicación que intentaremos ter solventados o antes posible”.
asistencia sanitaria no courel
Como sucede dende hai anos, no Courel non se están a cubrir as baixas de médicos nin enfermeiras do centro médico ao igual que tampouco se están a facer gardas nocturnas. Por iso, dende Courel Vivo e en Marea presentaron unha queixa ante Valedor do Pobo que admitiu a trámite a súa reclamación e para a cal se vai poñer en contacto coa Consellería de Sanidade.
Neste senso, todos os partidos do Courel, PP, PSOE e Courel Vivo, manifestaron a súa disconformidade coas actuacións levadas a cabo pola Xunta en materia de Sanidade. De acordo coa admisión a trámite desta queixa, Dolores Castro ten claro que “non é normal que non se cubran baixas nin vacacións ao igual que non teñamos un médico de garda. Temos unha poboación de avanzada idade e vivindo en núcleos moi espallados. Se a isto lle engadimos a neve no inverno, está claro que é imprescindible ter máis medios no noso centro de saúde“.
