O Concello de Folgoso do Courel manterá este xoves un encontro cos afectados que perderon a súa vivenda no incendio de xullo para tramitar axudas.
A alcaldesa, Lola Castro, confirmou este mércores que o goberno local “está a completar algún requirimento que pediron as comunidades de montes e apicultores” e axuda á veciñanza a contestar estas demandas “porque ía algunha documentación incompleta”.
O encontro deste xoves estará orientado a asesorar ás persoas que perderon a súa vivenda polo lume para que poidan solicitar as axudas ata o 22 de novembro.
En concreto, as subvencións pediranse para catro casas de primeiro uso e para outras oito segundas vivendas, como apuntou a rexedora, que avanzou que pedirán ao Goberno central que inclúa nas axudas, de 15.000 euros, a aquelas segundas residencias danadas polo lume.
Ademais das vivendas calcinadas polas chamas, tamén están afectados trece apicultores do municipio do Courel que perderon as súas explotacións. Neste caso, o consistorio recomendou aos apicultores que tramiten as solicitudes conxuntamente.