Folgoso do Courel celebra este sábado 22 de xullo unha nova edición da coñecida ‘Festa da Cultura e a Tradición’, un evento que vai consolidándose ano tras ano.
A baixada de carrilanas, programada para as 12:30 h., é un dos acontecementos programados que máis expectación esperta pola curiosidade de ver que vehículos van competir e que prestacións ofrecen no percorrido descendente que vai dende o antigo Colexio ata a meta, situada na Praza de Fondo de Via.
Falamos con dous participantes, Dani e Roberto, para saber como chegan á proba deste ano. Dani, de Santa Eufemia, contounos que nesta ocasión apurou bastante na fabricación do seu vehículo e que será compartido co seu fillo Anxo. Non queren desvelar moito máis e nin foto pasaron argumentando que “vai ser unha sorpresa”, co cal hai que desprazarse ata Folgoso para poder ver o bólido en acción.
Por outra banda, Roberto, veciño de Ferreirós de Arriba, explica para poñernos en situación que dende o 2011 só fallou dúas veces, unha polo Covid e outra polas vacacións. Comenta que apuntarse o primeiro ano foi para el un reto polo feito de construír a carrilana, e así o segue tomando ata o día de hoxe. Sabemos tamén que antes ía a carreiras de carrilanas doutros concellos, pero agora xa non se move tanto.
Como anécdota explica Roberto que o pasado ano axudou a organizar a baixada de carrilanas que se fixo o ano pasado en San Clodio, non Concello de Ribas de Sil. Foi no verán e o percorrido era parte da estrada que baixa da Moá. Recoñece que lle gusta o percorrido e que é unha mágoa que este ano non se poida facer polo tema dos seguros.
Conta tamén o noso informante que antes era máis doado poder participar en diferentes probas de Carrilanas porque podíase contratar un seguro por día, e ademais non saía caro. Agora, seica iso non é posible e cómpre estar federado, feito que supón o pago de 85 € ao ano. En Galicia a referencia é a Federación de Deportes de Inercia (FDI).
“Compítese para pásalo ben… ás veces hai piques, pero sanos porque non hai cartos polo medio”, reflexiona Roberto adiantándonos que terá 3 carrilanas en boxes do circuíto de mañá: a carrilana del e dúas máis que empregarán un irmán e a un amigo.
RESTO DO PROGRAMA
Rematada a baixada de carrilanas, ás 14:00 h. farase a apertura da Feira de Artesanía e a Exposición de Xogos Tradicionais no emblemático Souto da Carroza. A organización lembra que haberá postos de venda de produtos locais e servizo de polbo e churrasco.
Ás 16:00 h. comezará o ‘Campionato de Xogos Tradicionais’, tendo disciplinas como, por exemplo: arrebolamento de sacho, lanzamento de boina, a chave, a billarda,corte con tronzón.
Ás 17:30 h. actuación do Grupo Merenzao, de Amigos da Pandeireta, co patrocinio do programa Tradigalu da Área de Cultura da Vicepresidencia da Deputación de Lugo; e ás 19:00 h. actuación do grupo tradicional O Recanto de Quiroga.
Ás 20:00 h. será a entrega de trofeos e ás 21:00 h. a Cea Popular, previa á verbena que amenizará o Dúo Eclipse.
