A fin de semana do 21 e 22 de xullo, Anguieiros vestirase de gala. Grazas á labor da Asociación Sociocultural Boca do Monte, creada no 2010, as celebracións na honra da Virxe da Madalena desta pequena aldea de só 5 veciños, volven rexurdir.
O programa para o 2018 comeza o sábado 21 cunha camiñada que partirá as 9:00 horas de Montefurado para dirixirse ó Ermidón, subirá ata Centeais e rematará no punto de partida. Esta actividade ten como obxetivo percorrer un pequeno treito do Camiño de Inverno e coñecer aldeas da contorna. 15 quilómetros de andaina que contarán cunha alternativa máis curta, duns 7 quilómetros, para os que consideren que o trazado principal é moi longo.
Tras este paseo matutino, ás 18:00 horas celebraranse xogos infantís. Carreira de sacos, tiro de corda, bolos celtas e o tradicional xogo da chave. Seguidamente, ás 20:00 horas, haberá unha charla sobre aviación en Galicia a cargo de Xerardo Rodríguez Arias onde se tratarán curiosidades históricas relacionadas coa contorna e servirá de anticipo para a presentación do seu libro “100 anos de aviación en Compostela”. O día rematará cunha merenda popular aberta ós veciños e visitantes ó redor das 22:30 h. Os alí presentes poderán gozar dunha Foliada Tradicional a cargo do grupo Ouroxobruxo da Rúa.
O domingo, día propio da Madalena, o protagonismo será para o VII Campionato de Bolos Celtas a partir das 10:00 horas. Ás 12:00 horas entregaranse os premios do campionato e haberá Ruada a cargo do Grupo de Gaitas Abertal . Ás 13:00 horas, misa solemne, procesión, aperitivo popular e sesión vermuth.
