Tres persoas, entre eles un menor, foron evacuadas na noite deste luns ao Hospital de Monforte con síntomas de intoxicación por monóxido de carbono no interior dunha vivenda situada na Rúa Río Lor, en Quiroga.

Segundo informou o 112, mediante as correspondentes medicións realizadas polos efectivos do GES de Quiroga comprobouse que nas habitacións había “unha alta concentración de monóxido de carbono, posiblemente provocado pola mala combustión dun quentador de auga”.

Con todo, o 112 destacou será necesaria a intervención dos técnicos da empresa subministradora do butano para verificar a instalación do quentador e o seu correcto funcionamento. Así, os xestores do 112 Galicia tamén enviaron aviso á compañía co fin de que leve a cabo a revisión de toda a instalación e confirme as causas da fuga.

O aviso sobre estes feitos recibiuse no 112 Galicia sobre as 23,00 horas do luns mediante Urxencias Sanitarias de Galicia-061, que enviou unha dotación ao momento por tres ocupantes dunha vivenda con síntomas de intoxicación por monóxido de carbono.

De feito, o tres afectados foron evacuados en ambulancia ao Hospital de Monforte para recibir “o tratamento necesario en función do cadro médico que presentaban”, sinalou o 112.

En concreto, confirmaron a Europa Press fontes sanitarias, o 061 desprazou dúas ambulancias de soporte vital básico e un equipo sanitario da PAC de Quiroga para atender ao home R.A.M., de 44 anos, á muller A.S.P.V., de 43, e a un menor, que foron trasladados ao Hospital de Monforte.

Para realizar as correspondentes medicións sobre a presenza de monóxido de carbono no interior da casa, o persoal do 112 Galicia solicitou a intervención dos membros do GES de Quiroga e dos Bombeiros de Monforte. Tamén foi informada a Garda Civil.