A plataforma ‘EiquíEólicosNon, Courel libre de eólicos‘ convocou unha manifestación contra a “especulación eólica” o vindeiro sábado, a partir das 12,00 horas que arrincará da Praza de España do concello de Quiroga.
En declaracións aos medios este xoves, un dos portavoces do colectivo responsable da protesta, Pablo González, aseverou que “sobran os motivos” para mobilizarse contra a “invasión eólica” que afecta “ao rural desta zona e tamén a outras moitas de Galicia”.
González denunciou que está “proxectado un megaparque, dunha empresa propiedade do Reino de Noruega na zona do Courel, nos límites co Bierzo, e é precisamente no Bierzo onde levan a peor parte”.
Así mesmo, o colectivo pon o foco en que na zona sur desta área estean proxectados “cinco parques de 50 MW interconectados”, xa que “non son independentes” senón que, segundo González, “é outro megaparque que tentan metelo como cinco parques pequenos”.
