A Fundación Legar, impulsada por Xavier Blanco –gaiteiro, artesán e técnico en cultura tradicional– nace co obxecto de difundir e promover a preservación, conservación, mellora, protección, vixilancia e desenvolvemento da música de raíz.
Xavier leva máis de 30 anos percorrendo diferentes vilas e parroquias de Galicia gravando e catalogando todo tipo de documentación relacionada coa nosa cultura tradicional. Neste labor de recollida conta cun amplo arquivo sonoro, partituras e fotografías recollidas de mestres, músicos, maiores… portadores todos eles da música de raíz transmitida de xeración en xeración a través da oralidade. Posúe unha colección de máis de 900 instrumentos tradicionais galegos.
CENTRO DE INTERPRETACIÓN DE MÚSICA DE RAÍZ
Co obxectivo de dar a coñecer este patrimonio musical, a Fundación Legar pensou no Courel, concretamente na aldea da Seara (Quiroga), para crear un centro de interpretación de música de raíz. E por que neste lugar? Pola recuperación exemplar desta aldea dende o punto de vista arquitectónico, respectando as características da arquitectura de montañasta aldea, e pola súa fermosa contorna natural que contaxia serenidade. A presentación do proxecto terá lugar este 4 de xuño as 12.00 h. na Casa da Cultura do Concello de Quiroga.
O obxectivo principal do futuro Centro de Interpretación é a investigación, conservación, divulgación é posta en valor do legado cultural e patrimonial de raíz, sempre dende un prisma sinxelo e compresible, adaptándose ao público que o visite, unindo a sabedoría e a tradición oral en interacción coa contorna, creando así, espazos en calma.
Entre as actividades pensadas para ofrecer ao publico en xeral, destacan as seguintes: “Representacións Didácticas de música de Raíz”, “Paisaxes Sonoras, Rutas Musicadas”,“Im·Raíz”,“ A Cultura musical do noso Mar” e “Mulleres Raíz”.
A perspectiva ecolóxica e sustentable tamén estará presente, traballando pola unión entre o eido cultural da música e o respecto coa contorna.
Asistirán ao acto María Olga Iglesias Fontal –Xefa Territorial da Consellería de Medio Rural de Lugo e Alcaldesa de Triacastela– e Julio Álvarez Núñez —–alcalde de Quiroga–.
