Un traballador faleceu na mañá deste xoves no municipio lugués de Quiroga ao caerlle encima un piñeiro mentres realizaba tarefas forestais.

O accidente produciuse minutos despois das 10,30 horas no lugar das Covas, que pertence á parroquia de Augas Mestas, segundo informou o CIAE 112 Galicia.

Ata o lugar mobilizáronse profesionais de Urxencias Sanitarias 061, que só puideron confirmar a morte do operario.

Un equipo do Grupo de Emerxencia Supramunicipais de Quiroga traballa na zona para retirar a árbore e liberar o corpo da vítima.