O Concello de Quiroga presentou días atrás o programa de actividades para celebrar o San Martiño, Patrón desta localidade, a fin de semana do 11 e 12 de novembro.
O día grande, e día propio do San Martiño, está programada para as 11:00 h. unha alborada polo barrio da Praza a cargo do Grupo de Gaitas O Recanto; e un pouco máis tarde, ás 12:00 h., terá lugar a Misa e a Procesión acompañada neste caso pola Banda de Gaitas San Martiño.
Durante a mañá é tradicional que se faga rolda polas adegas dese barrio, como acto de socialización e confraternidade veciñal que continuará pola tarde coa celebración do Magosto no medio da Praza Maior a partires das 19:00 h. A esa hora volverán tocar os músicos do Recanto e a continuación amenizará a noite a Disco Móbil “Apolo”.
PRESENTACIÓN LITERARIA
Antes da celebración do devandito Magosto, concretamente ás 18:00 h., a Casa da Cultura acollerá a presentación da nova obra literaria de Celia Díaz, “filla adoptiva de Quiroga” dende o ano 2018.
A obra en cuestión leva por título “As faces do diamante”, un libro que contén 10 relatos con historias marcadas por situacións persoais que “marcan unha vida” e que demostran que vivimos en “mundos interpretativos”, porque como di a propia autora: “a verdade, coma os diamantes, é distinta segundo o ángulo desde a que a observamos”.
Outra característica deste libro de relatos, e que lle dá un atractivo engadido, é que as historias “entrecrúzanse e interrelaciónanse” con personaxes dun relato que reaparecen noutro posterior dándolle un sentido de historia plural á obra.
DOMINGO 12
O domingo, e como remate á fin de semana do San Martiño quirogués, o Auditorio Municipal acollerá unha obra de teatro. Representarase ás 18:00 h. “ODT-TVE”, peza que levarán a escea o Grupo de Teatro “Os Torques” de Burela.
