O Concello de Quiroga comeza xa coa organización da XXIV Mostra do Aceite, outro evento de gran relevancia polo que significa poñer en valor un produto autoctono como é o aceite.
A data escollida para a celebración deste ano é o 21 de abril, data escollida por consenso na xuntanza mantida entre olivicultores e representantes municipais.
A Mostra do Aceite desenvolverase no lugar habitual das Farrapas, en Bendilló, onde se fai a recreación da elaboración tradicional no muíño e onde se poñen os diferentes postos de venda do aceite de oliva de Quiroga.
INSCRICIÓN DE OLIVICULTORES
A falta dun mes para a súa celebración ábrese o prazo de inscrición para participar nesta Festa de Interese Turístico de Galicia. O número de colleiteiros está limitado a 8 polo que os interesados e interesadas en participar serán seleccionados/as por orde de inscricións no rexistro de entrada das oficinas municipais. Os requisitos imprescindibles, como en anos anteriores, serán contar co rexistro sanitario vixente e ter unha colleita mínima de 200 litros de aceite.
No momento de realizar a inscrición, que se poderá facer ata o 27 de marzo, é obrigatorio presentar unha mostra dun litro de aceite en envase de cristal para realizar posibles catas.
