O Concello de Quiroga preparado para festexar o San Martiño. Será este luns e seguindo o guión básico que marca a tradición: Misa e Procesión, alborada polas adegas do barrio da Praza Maior e Gran Magosto popular pola noite con fin de festa musical.
Ás 11:00 h. terá lugar a Misa Solemne na honra ao San Martiño, con procesión que estará acompañada da música tradicional do grupo O Recanto.
A continuación terá lugar a Alborada polo Barrio da Praza Maior, epicentro da festividade, que estará amenizada pola formación anterior. Este é un dos grandes momentos do San Martiño quirogués no que a veciñanza abre as portas das súas adegas e saca pinchos que se ofrecen aos músicos e ás persoas que participan do percorrido festeiro. Respírase un gran ambiente e as rúas deste emblemático barrio da vila de Quiroga énchense de vida.
Unha horas máis tarde, e despois do oportuno descanso dos romeiros anteriores, terá lugar o Magosto na Praza Maior como é costume e tradición. A partir das 19:00 h. Castañas e viño novo serán os protagonistas xunto co acompañamento musical do Recanto. A degustación de bullotes e o viño serán de balde para todos os asistentes.
A partir das 20:00 h. o acompañamento musical e fin de festa correrán a cargo de DJ Míchel.
