A xunta de Micoloxía “Lactouros”, en colaboración con “Coureleando”, convida a participar nunha andaina guiada este domingo, 13 de outubro, que percorrerá un traxecto de 10 quilómetros desde a aldea de Torbeo ata A Cubela.
O roteiro presenta unha dificultade media-baixa, ideal para gozar da contorna natural da zona e da espectacularidade do meandro da Cubela. O percorrido escollido pola organización desta andaina réstalle 5 quilómetros á ruta circular que une Castro de Abaixo, Torbeo, A Cubela e Castro de Abaixo, evitando a subida inicial da ruta. Segundo nos indica o guía, Iván Álvarez Merayo (Coureleando): “son dez quilómetros de baixada e así medio chao, moi chula toda metida polo medio do canón do río do Sil e imos aprender un pouco sobre xeoloxía e arqueoloxía”.
Ademais, como explican dende a organización, “ao finalizar a camiñada, os participantes poderán gozar dun xantar no Restaurante Luis de Rairos, que contará cun menú típico composto por anguías e troitas do Lor, con opción vexetariana dispoñible”. O prezo da actividade é de 30 € para socios/as e de 35 € para non socios/as. O custo inclúe o transporte en autobús ata Torbeo e despois a recollida para ir ao Restaurante e de volta a Monforte. E tamén a comida, o acompañamento dun guía e o seguro da actividade.
A saída está programada para o domingo 13 de outubro as 9:00 horas desde “As Casitas” da Compañía de Monforte de Lemos. Recoméndase ás e aos asistentes levar roupa e calzado axeitados, ademais de auga e algo para picar durante o percorrido.
Para inscribirse, cómpre contactar a través do teléfono 671 473 982, preferiblemente mediante WhatsApp.
