O día 30 de outubro ás 12:00 h. terá lugar a misa na honra do patrón, San Clodio, e ás 13:00 h. procederase á inauguración da remodelación do Pavillón Polideportivo Municipal, das obras de accesibilidade á Fonte da Prata e das melloras nas instalacións deportivas do parque das bicicletas.
Rematado o acto protocolario anterior, ás 13:30 h. terá lugar un Xantar Popular a base de empanada, polbo e bica; e ás 20:00 h. farase un Magosto. Os dous encontros gastronómicos realizaranse no propio pavillón polideportivo municipal. Como remate a esta primeira xornada festiva, actuación do Dúo Estrellas a partir das 20:30 h.
O 31 dedícaselle á XXIV Festa da Terceira Idade. Ás 13:15 h. terá lugar unha misa dedicada aos maiores e ás 14:00 h. o Concello de Ribas de Sil agasallaraos cunha paparotada no pavillón.
Xa pola tarde-noite, ás 20:00 h. está programada unha Chourizada na Praza do Concello que estará acompañada a partir das 21:00 h. do Dúo Explosión e xa sobre a media noite coa música do DJ Adri Díaz.
Na última xornada de festas, o 2 de novembro, haberá unhas degustacións de balde con elaboracións realizadas con produtos do mar na Praza do Concello e en horario de 12:00 a 14:00 h. e de 17:00 a 21:00 h. Trátase dunha iniciativa da Xunta e Galicia, “Galicia Sabe a Mar”, para fomentar o consumo de peixe.
Ás 19:00 h. haberá teatro no Salón de Actos do Concello. A peza: “As mentiras teñen os pés pequenos”.
