Láncara é un concello que se fai notar. Apenas 2500 persoas viven neste municipio da Comarca de Sarria; que, porén, vén de acaparar titulares en medios estatais nos últimos días tras un curioso xesto do seu alcalde. Darío Piñeiro (PSdeG) decidiu responder ás declaracións de Alberto Garzón recomendando un menor consumo de carne enviándolle un chuletón; todo baixo a premisa de que neste punto do sur de Lugo se produce carne “de calidade e en extensivo”.

Con todo, a visibilidade deste concello que non se deixa caer no descoñecemento vén de atrás. Para moitas persoas, Láncara comezou a aparecer nos mapas despois dunha tarde de 1992 na que recibiu un visitante pouco habitual: Fidel Castro. O representante cubano acudiu á localidade lucense invitado por Manuel Fraga, con quen mantiña unha sobradamente coñecida boa relación que propiciou imaxes tan clásicas como a partida de dominó entre líderes e os paseos de ambos polas rúas da localidade.

Foi nesa visita en que o consistorio de Láncara nomeou a Fidel fillo adoptivo da localidade. O recoñecemento, malia poder parecer atípico ou arbitrario, tiña razón de ser: Láncara era a localidade natal do pai de Castro, que chegou a visitar a pequena casa na que este nacera e mesmo viu unhas curmáns que habitaban na zona.

Case 25 anos despois da cita inesquecible, os responsables locais de Láncara quixeron repetir a cita que os puxo no mapa nomeando fillo adoptivo a outro Castro. Esta vez foi Raul. A moción saíu adiante co beneplácito do actual rexedor, Darío Piñeiro, e o apoio de BNG e Compromiso por Galicia. Tamén se sumou o PP, que deu o “visto bo” a unha iniciativa motivada, máis que nada, polo compoñente turístico dunha cita que volvía poñer sobre o mapa a este concello que, no último século, perdeu dous terzos da súa poboación.

A casualidade quere que tanto Láncara como Cuba volvan estar de actualidade en días parellos. Fronte á fama renovada do concello lucense polo envío do chuletón, Cuba vive nestes días unha vaga de protestas por parte de poboación crítica co réxime que, de acordo coa prensa española, garda relación cun dobre desabastecemento: o das vacinas –producidas na propia illa– e o dos alimentos.