O Festival Terra Brava do Incio cumpre 16 anos e prepara unha morea de propostas na carballeira preto da capitalidade municipal, en dirección a Ferrería. A sesión vermut correrá a cargo da Balkan Paradise Orchestra, posteriormente celebrarase xantar popular e na sobremesa haberá música brava a cargo das Vikingas e xogos para nenos e maiores, ademais dunha nova actuación de Balkan Paradise Orchestra.
Para participar do xantar é preciso mercar as entradas na libraría O Garabato no Incio ou reservar nos teléfonos 669914526 ou 670441713.
O Festival organízao a Asociación Cultural Terra Brava e forma parte da programación cultural do concello coa que colabora a Deputación cun investimento de 20.000 euros. Desde a organización e as administracións colaboradoras animaban a veciños e visitantes a participar do festival nun enclave único e a gozar do patrimonio, a gastronomía e as paisaxes do Incio.
O plato forte do festival será cos concertos da noite, a partires das 21.00 h. actuarán as formacións galegas Faíscas da Pontraga, Böj, Ruxe Ruxe e Os Vacalouras.