A conselleira do Medio Rural, María José Gómez, xunto coa directora xeral da Axencia Galega de Desenvolvemento Rural, Paz Rodríguez, reuniuse o pasado 12 de setembro coa alcaldesa do concello de Paradela, Montserrat Mulet, para seguir colaborando con esta localidade nos labores de prevención de incendios forestais e de xestión da biomasa no municipio.

Esta cooperación enmárcase no convenio asinado entre a Consellería do Medio Rural, a empresa pública Seaga e a Federación Galega de Municipios e Provincias para a creación dun sistema público de xestión da biomasa na rede de faixas secundarias, as máis próximas ás vivendas, un acordo ao que está adherido o municipio de Paradela.