O marido da exconcelleira do PSOE de Sarria Ana Arias foi detido esta fin de semana por un suposto delito de violencia de xénero. A muller estivera desaparecida entre o xoves e o venres da semana pasada; agora puxo denuncia contra a súa parella.
Segundo informan fontes oficiais, o apresado pasou a disposición xudicial na xornada deste domingo e o xuíz deixouno en liberdade, aínda que tomou medidas cautelares respecto da súa esposa.
Ana Arias desapareceu o pasado xoves 14 de novembro tras abandonar o seu domicilio. Todas as alarmas saltaron cando a muller non chegou ao seu posto de traballo, situado en Lugo.
Ao día seguinte, venres día 15, foi localizada pola Garda Civil nun hotel de Lugo. Tras o seu achado, a exedila foi trasladada a un centro médico para avaliar o seu estado de saúde.
Axentes da unidade de seguridade cidadá e da agrupación de Tráfico da Garda Civil montaran un dispositivo de procura con apoio aéreo e guías caninos. Ana Arias foi concelleira do PSOE en Sarria entre os anos 2003 e 2011.
