O incendio que afectou a unha nave de aluminio e parte doutra de madeira en Sarria, e que obrigou a activar o plan territorial de emerxencias, quedou extinguido.
Concretamente, a última hora da noite do mércores desactivouse o Platerga. Ao redor das 22,00 horas o incendio deuse por extinguido, segundo informa o 112.
Os servizos de emerxencia confirmaron que se tratou dun incendio en dúas naves lindeiras, unha dedicada ao aluminio e outra á madeira, pero resultou máis afectada a de aluminio. Nela, ardeu todo o falso teito e un almacén con distintos tipo de materiais, ademais de parte da cuberta. No caso da nave de madeira, o incendio afectou tamén á súa cuberta e a un almacén con materiais.
Con motivo deste incendio industrial, a pasada tarde, a Xunta de Galicia activou o nivel 1 do Plan Territorial de Emerxencias de Galicia (Platerga) co fin de permitir a mobilización dos medios e recursos de ámbito xeográfico local ou supralocal.
O 112 Galicia tivo coñecemento dos feitos, pasadas as 18,30 horas, cando varias testemuñas informaron deste lume. Así, as persoas indicaban que saía fume, e mesmo chamas, dunha fábrica de madeira afincada no lugar de Callás, en San Fiz de Reimóndez.
O Centro Integrado de Atención ás Emerxencias de Galicia ( CIAE-112) déuselle o aviso aos Bombeiros de Sarria, á Garda Civil, á Policía Local e a Protección Civil. Ademais, como medida preventiva, tamén se alertou aos profesionais de Urxencias Sanitarias de Galicia-061 e, ante a necesidade de dar apoio nas tarefas de extinción do lume no punto, foron alertados medios forestais, os Bombeiros dos parques de Lugo e de Monforte, así como o GES de Becerreá e de Monterroso.
