A primeira edición de “Ultreia et Suseia” celebrarase na comarca de Sarria entre mediados de xullo e mediados de agosto co obxectivo de dinamizar as tardes e noites do verán. As actividades, que serán vehiculadas a través do Camiño Francés, conteñen espectáculos de comedia, concertos, artes escénicas e charlas.
As actividades de Ultreia et Suseia, nome que fai referencia ao histórico saúdo do Camiño de Santiago e que pode traducirse do latín como “Segue adiante, máis arriba”, son de balde agás as actuacións dos monologuistas Goyo Jiménez, que abre o festival o 22 de xullo, e de Carlos Blanco, que actuará o 12 de agosto.
Este evento, organizado pola produtora Etiqueta Negra, conta co importante apoio económico da Xunta, Xacobeo 21-22, Concello de Sarria e Oficina de Turismo de Sarria.
Este novo evento, segundo palabras dos organizadores, “nace da converxencia do ciclo de monólogos Sarria Sorrí, que nas súas dúas edicións trouxo a grandes estrelas da stand-up comedy á comarca de Sarria, e do festival de contos e narración oral Sarria Sorrí”. Ultreia et Suseia intentará , dende unha visión artística multidisciplinar, poñer en valor a zona dende todos os ámbitos culturais posibles.
ARTES ESCÉNICAS
Ultreia et Suseia apostará tamén espectáculos de artes escénicas, tamén de balde nos que, por exemplo, pequenos e maiores poderán de sesións de narración oral como O paroleiro, levada a cabo por Pablísimo, e de Na punta da lingua, espectáculo de Ana Carreira.
Pensando no público adulto, preséntanse outros espectáculos narrativos como o que propón Ángeles Goas con O medo é libre no que mesturará contos propios e outros que proveñen da tradición oral sobre o medo e as súas consecuencias. María da Pontragha, outra das narradoras emerxentes galegas, presentará Coa palabra na boca contando historias de disidencias cheas de heroínas que non existen nos libros e heroes sen nome.
CAMIÑOGRAFÍAS
Camiñografías poñerá fin a este ciclo o 13 de agosto. Trátase dunha xornada completa para coñecer doutro xeito o patrimonio hist´órico de Sarria. Participarán César No, Ernesto Is, Nerea Breyh, Javier G. Lojo e Mr. Brandán & CO facendo posible unha experiencia inmersiva onde se poderán descubrir as realidades históricas de Sarria.
Ademais, este fin de festa de Ultreia et Suseia incluirá a actuación en directo dos vigueses Caldo, unha formación que achega a música tradicional a contextos sonoros contemporáneos a través da experimentación cos propios instrumentos; e tamén haberá unha pinchada de Jorginho DJ e JLG.
