O ciclo #DescubrindoSarria foi unha iniciativa apoiada polo Concello de Sarria para coñecer, baixo unha ollada diferente, o concello con paseos guiados de balde que tiveron lugar entre o 5 de xuño e o 4 de setembro.
Nesta última visita pola vila de Sarria, Guido Guía –turismólogo responsable da actividade– contou coa compañía e o traballo de Silvia Mondelo, unha sarriá que tamén é guía oficial de turismo e que está encamiñando un proxecto de visitas guiadas de autor coñecido como “A paraxe da Bolboreta”.
Segundo nos conta Guido, o balance dos catro paseos guiados foi moi satisfactorio. Un centro de persoas achegáronse a Sarria e remataron a orixinal e personalizada visita facendo picnic na área recreativa do Chanto. O primeiro paseo tivo vomo fío condutor o Camiño Francés, o segundo a Ruta das Aceas, o terceiro o centro histórico de Sarria e este derradeiro serviu para coñecer “a Sarria da Paraxe da Bolboreta”.
A colaboración de Guido con Silvia foi a primeira, pero seguramente farán máis sabendo que a conexión entre eles é fantástica.
