O Eixo Atlântico deu a coñecer este venres 16 de decembro o informe “Estratexias Turísticas para Sarria: O Camiño de Santiago como Dinamizador Turístico”, no Concello de Sarria. Ao acto, acudiu o secretario xeral do Eixo Atlântico, Xoán Vázquez Mao, o alcalde do Concello de Sarria, Claudio Garrido, e a concelleira de Camiño de Santiago e de Cultura, Reyes Abellá.
O 30% dos peregrinos que chegan a Compostela teñen como punto de partida Sarria e, máis do 50%, recorren o Camiño Francés. Por este motivo, Sarria é un concello protagonista neste modelo turístico. O municipio asume un forte compromiso co produto “Camiño de Santiago”, sendo o único municipio galego que conta cunha concellería do Camiño de Santiago.
Este informe, escrito por Mª Carmen Pardo López (IPVC, Instituto Politécnico de Viana do Castelo; Centro de Investigação Desenvolvimento e Inovação em Turismo (CITUR) – Coimbra) e Ana Luísa Ladeiras (CEO, Around Europe Advisors, Lda.), ten como obxectivo conseguir propor actuacións viables técnica, económica e legalmente, que permitan impulsar o turismo en Sarria como municipio protagonista no Camiño de Santiago.
Sarria é o único municipio galego que conta cunha concellería do Camiño de Santiago
ACCIÓNS PARA IMPULSAR O TURISMO RELACIONADO CO CAMIÑO DE SANTIAGO
Dentro das dez accións que as expertas elaboraron, destácase a iniciativa de tematizar Sarria como un territorio que se coñeza como “A Vila do Camiño”, aumentando o seu reclamo por si mesma. Outra actuación estudada é a de adaptar o Camiño ao público infantil. Esta idea, denominada “Camiño iniciático”, contempla unha inmersión no camiño dun xeito sinxelo, divertido e didáctico.
Por outra banda, o informe presenta o proxecto “Centro de inmersión nos Camiños de Santiago”. Este espazo sería unha razón para visitar expresamente Sarria dirixido, expresamente, a aqueles potenciais peregrinos de proximidade e, para que os peregrinos de paso, aumenten a súa estancia en Sarria.
