O acordo entre Votorantim Cimentos e Acciona Enerxía ten unha vixencia de 10 anos e súmase a outro rubricado coas mesmas compañías para o período 2024-2033 e que representa o 6% do consumo eléctrico da compañía cementeira. O contrato formalizouse a través de Fortia, plataforma de xestión da enerxía para grandes consumidores industriais.
A enerxía 100% renovable procederá das instalacións de Acciona Enerxía e abastecerá ás seis fábricas de cemento que Votorantim Cimentos ten en España, unha delas en Oural, no Concello de Sarria, axudando a descarbonizar a súa actividade. O uso deste 25% de enerxía limpa supón unha redución de 6.400 toneladas de emisións de CO2 anuais á atmosfera, que equivalen ás que emiten 4.500 coches en circulación durante un ano.
Esta iniciativa está en liña cos obxectivos 2030 da compañía cementeira, que prevé que nesa data o 50% do consumo eléctrico das súas instalacións proceda de enerxías limpas. Segundo Juan Aguilera, director Industrial de Votorantim Cimentos “Temos ante nós a posibilidade de contribuír amplamente á transición ecolóxica. O consumo e a produción responsables son indispensables para lograr un desenvolvemento sostible. En Votorantim Cimentos traballamos para incrementar as nosas solucións sostibles, como o uso de enerxías limpas, e ampliar o uso de materias primas e combustibles alternativos no noso proceso de fabricación”.
VOTORANTIM CEMENTOS
Esta multinacional brasileña de materiais de construción e solucións sostibles conta con máis de 12.000 empregados e a súa carteira de materiais de construción inclúe cemento, formigón, morteiros e áridos. Tamén posúe negocios nas áreas de produtos para uso agrícola, xestión de residuos e coprocesamiento. As súas operacións están estratexicamente situadas preto dos mercados en crecemento máis importantes, en once países: Brasil, Arxentina, Bolivia, Canadá, Luxemburgo, Marrocos, Tunes, Turquía, España, Estados Unidos e Uruguai.
Votorantim Cimentos está presente en España coas marcas Cemento Cosmos, Cemento Teide, Cementos Balboa, Prebetong Áridos, Prebetong Formigóns e Morteiros Pulmor e conta con fábricas de cemento en Alconera (Badaxoz), Córdoba, Málaga, Niebla (Huelva), Oural (Sarria / Lugo) e Toral dos Vaos (León); moendas de cemento en Tenerife e Bobadilla (Málaga); plantas de formigón, unha planta de morteiro e explotacións de áridos situadas en Andalucía, Canarias, Castela e León, Extremadura e Galicia.
