A sección sindical de CIG-Xustiza alertou dunha situación de “saturación” no xulgado de Sarria por “a falta de persoal suficiente para atender a elevada carga de traballo”.
Nun comunicado, a organización sindical acusa á Xunta de “enganar a toda a veciñanza da comarca” ao anunciar “publicamente o pasado mes de decembro” que non ía retirar o persoal de reforzo. “Semanas despois o xulgado quedou sen este persoal”, denuncia.
O secretario nacional da CIG-Xustiza, Óscar Freixedo, critica este incumprimento e informa de que “hai máis de dous meses que hai dúas prazas neste órgano sen cubrir”, o cal implica “sobrecarga de traballo e atraso na tramitación de expedientes”.
Freixedo reclama á Xunta que proceda “de inmediato” a cubrir o reforzo e dote a todos os órganos xudiciais dos cadros de persoal necesarios para garantir unha administración de xustiza “eficaz e rápida”.
