O Concello de Sarria, facendo balance do Nadal, vén de comunicar que “pecha con éxito o Nadal sobre Xeo! con máis de 6.000 persoas que desfrutaron da pista de xeo”. Informa ademais “que se repartiron máis de 15.000 entradas grazas ás compras nos máis de 100 comercios locais inscritos”. A pista de xeo foi unha aposta do goberno local para dinamizar o comercio de proximidade e o resultado, vistos os datos, foi moi satisfactorio.
Xunto a esta actividade, houbo tamén un Mercado de Nadal, con 5 casetas e 10 postos rotatorios para dar visibilidade a produtores artesanais, artistas e asociacións locais, cunha oferta única e actividades culturais como foi o concerto de Sound Sisters –o 24 de decembro– ou os Cantos de Reis, que correron a cargo da Asociación Cultural Peleriños.
OUTRAS ACTIVIDADES
Ademais do clásico Concerto de Nadal na Igrexa da Nosa Señora do Rosario, no que participaron as formacións Sarricanta, Coral Polifónica e Banda de Música do Concello de Sarria; de varias actuacións infantís e do tradicional “Nadal Máxico”, con Roberto Lolo e Mago Iago como protagonistas, este ano houbo unha actividade que levou contos ao rural. Baixo o título “Conto de Nadal polo Rural” fixéronse diferentes actuacións de narración oral os días 2 e 3 de decembro nas parroquias de Mañán, Vilapedre, Vilamaior, Oural, Ortoá; e tamén na Casa da Cultura de Sarria.
O contacontos itinerante foi “Nadal en prácticas”, que seica tivo moi boa acollida tanto pola cativada como polo público maior que asistiu ás sesións.
