A Vicepresidencia da Deputación de Lugo colabora un ano máis co programa de Festas do San Xoán de Sarria, e faino co “VibraXoán”, unha programación musical con varios concertos o sábado 21 de xuño.
O vicepresidente da Deputación de Lugo, Efrén Castro, a concelleira de Festas, Eugenia Valcárcel, e o concelleiro de Acción Cultural, César No, presentaron o cartaz o pasado 10 de xuño. Nel destaca a actuación de Sidonie, banda referente,da escena musical estatal, e que incorpora o talento local con Sound Sisters e a charanga local Louband ademais da Disco Móbil La Duendeneta.
Efrén Castro valorou “a variedade musical que o programa engade ao San Xoán, dando maior proxección a unhas festas con moita tradición que son un referente máis aló de Sarria e da comarca” e destacou que “este ano reforzamos a colaboración co Concello para a organización deste programa musical cunha achega de 25.000 euros, que se suma ao apoio que desde a área de Cultura se ofrece ao tecido asociativo de Sarria na organización de actividades culturais e lúdicas ao longo de todo o ano”.
Os concertos, con entrada gratuita, celebranse no campo de rugby de Sarria, desde as 21.00 horas.
