Do 23 ao 27 de xuño, a vila de Sarria volverá encherse de música, tradición, lume, cultura e festa para celebrar as súas tradicionais Festas de San Xoán. Como cada ano, o concello volve presentar un amplo e atractivo programa, adaptado para todas as idades e que fará gozar á veciñanza e aos visitantes.
Días atrás xa se deu a coñecer o cartel anunciador, unha obra gráfica deseñada local por Ana Miranda que non só reflicte a ilusión e a maxia que representan estas festas cos clásicos foguetes, senón que tamén amosa a complicidade co pregoeiro, Borja Tosar, ilustrando o famoso eclipse de agosto do que tanto se fala.
No programa non poden faltar o espectáculo da gran fogueira, o espectáculo dos Correfoc dos Dimonis de la Plana e as populares verbenas. Pero tamén haberá espectáculos infantís e animación de rúa, bandas de música, agrupacións tradicionais e colectivos culturais da vila, torneo de fútbol sala e o festival “VibraXoán”. En definitiva, e como refiren dende o concello: “unha programación que combina tradición e modernidade para facer de Sarria un gran punto de encontro durante toda a semana festiva”.
PROGRAMACIÓN 2026
O martes 23 de xuño, véspera de San Xoán, comezan as festas ás 20:00 h co Desfile na Rúa Maior das Pampónigas e os Dimonis de La Plana. Pouco despois, ás 20:30 será o pregón dende o corredor da Casa do Concello a cargo do coñecido astrofísico sarriao, Borja Tosar. Como en anos anteriores, a súa alocución será comunicada ao público en linguaxe de signos.
Coa tirada do ‘Foguetón’ posterior dánse por comezadas as festas e actuarán acto seguido na Praza da Constitución a Coral Polifónica do Concello de Sarria, a Banda de Música de Sarria, e as asociacións culturais Meigas e Trasgos e Peleriños.
Despois, ás 21:30 h farase a clásica Pancetada Popular e ás 22:30 actuará o grupo Eoas. Chegada a noite, terá lugar ás 23h a 54ª Queimada Popular e ás 00.00 h o “Acendido da Fogueira de San Xoán”. Este esperado intre acaparará o interese de todo o mundo no Campo da Feira onde estarán os Dimonis de La Plana co seu espectáculo de música, danza e lume coñecido como ‘Correfoc’.
Como fin de festa, dende as 00:30 h, o Campo de Rugby acollerá a verbena amenizada pola orquestra Costa Dorada.
MÉRCORES 24 E XOVES 25
O mércores 24 comezará coa alborada da Banda de Música de Sarria e a recepción de autoridades na Casa do Concello ás 11:30h. Despois, Misa Maior na igrexa de San Salvador cantada pola Coral Polifónica do Concello de Sarria.
Pola tarde, ás 18:30 h pasarrúas con Peleiriños e Tambukda; e ás 19:30 h concerto na Praza da Vila coa Banda de Música de Sarria. O remate da xornada, dende as 21:30 h con festa e verbena a cargo das orquestras Los Satélites e París de Noia no Campo de Rugby.
A xornada do xoves 25 comezará pola tarde, concretamente ás 18:00 h, cun pasarrúas protagonizado polas Pampónigas e a Asociación Cultural Peleiriños. A esa hora, chega tamén a ‘Tarde Infantil’ con actividades centradas nos máis pequenos como globoflexia, pintacaras, manualidades, bailes, e maxia. Será na Praza da Vila e correrá a organización a cargo de Trémola Teatro. E por se iso fose pouco para a rapazada, ás 19:45 h chega o popular mago Roberto Lolo coa súa ‘Hora Máxica’ para poñer o ramo a unha tarde de moito lecer e entretemento.
Xa pola noite, a partir das 21:30 h. festa e verbena co Grupo Ráfaga e a orquestra New York no Campo de Rugby.
VENRES 26 E DOMINGO 27
O venres 26 comeza cun pasarrúas da Charanga de Paradela e Meigas e Trasgos ás 18:30 h. para despois gozar das mellores seleccións musicais da Discomóbil “A Duendeneta” no Malecón ás 19:30 h. O ramo á xornada, con festa e verbena das orquestras Trébol e Charleston Big Bang no Campo de Rugby, será a partires das 21:30 h.
O sábado 27, a Banda da Comarca de Sarria terá participación dobre. Ademais de estar no pasarrúas que abre a xornada, con Meigas e Trasgos, tamén ofrecerá un concerto ás 20h na Praza da vila. Mais o gran atractivo deste día será o festival ‘Vibraxoán’, que se desenvolverá no Campo do Río dende as 22:00 h da noite ata entrada a madrugada. Este ano contará cun cartel encabezado por The Rapants, unha das formacións galegas con maior proxección do panorama actual, e contará tamén con Mrs. Fine, unha bana emerxente que chega dende Valdeorras e que está causando sensación na escena musical cun repertorio no que fusiona indie, rock e pop. Pechando o cartel e o festival estará Duendeneta Dilleis, unha proposta de Carlos Crespo e Kris K Dj. Este evento, encaixado dentro do programa de festas, conta coa colaboración económica de Vicepresidencia da Deputación de Lugo.
Dende o concello lembran tamén que o domingo 28, día dedicado aos nenos e nenas, haberá descontos especiais para eles nas atraccións.
TORNEO DE FÚTBOL E DÍAS SEN RUÍDO NAS ATRACCIÓNS
Os días 26, 27, e 28 celebrarase no Pavillón Municipal José Mario González da zona recreativa do Chanto, o XXXVI Torneo Fútbol Sala San Xoán. A final será o domingo 28 ás 19:30 h.
Como en anos anteriores, María Eugenia Valcárcel, concelleira de Educación e Festas, lembra que nas festas “todos os días haberá dúas horas sen ruído, de 18:30 a 20:30, na zona das atraccións para facilitar que os nenos, nenas e maiores con hipersensibilidade acústica poidan gozar do San Xoán”.
