Nun ano de marcas para o Camiño de Santiago en pleno Ano Santo, as cifras revelan un incremento dos peregrinos que escollen o bautizado como ‘Camiño exprés’, é dicir, iniciar a ruta en Sarria para completar os 100 quilómetros esixidos a pé para lograr a ‘Compostela’.
Ante este fenómeno, os municipios que se sitúan antes desta localidade luguesa reivindícanse e avisan os camiñantes que, ao optar polo traxecto mínimo, deixan atrás lugares “máxicos” como a zona da montaña de Lugo.
Así o di a alcaldesa de Triacastela, Olga Iglesias, que convida as persoas que pensan en facer o Camiño proximamente a elixir unha vía un pouco máis longa e non se esquezan dun “lugar tan máxico como o traxecto que une O Cebreiro con Sarria”.
O concello lucense de Triacastela reclama o “peregrino de longa distancia” tras un verán no que o Camiño de Santiago volve bater marcas, pero no que trazados como este están a quedarse no esquecemento.
A alcaldesa de Triacastela, Olga Iglesias, lamenta que cada ano sexan máis os que saen de Sarria “deixando atrás unha zona máxica como son os bosques do Cebreiro e Triacastela”. Segundo os últimos datos publicados pola Oficina do Peregrino, en xullo foron 34.839 os peregrinos qu escolleron como ruta o Camiño Francés, aínda que existen diferenzas entre o lugar de partida.
Deste total, case 21.000 tomaron Sarria como saída, a distancia mínima para conseguir a Compostela. Con todo, só 1.312 foron quen decidiron emprender a súa aventura desde O Cebreiro. A rexedora popular sente que son moitos os que se están “esquecendo” do seu concello e por iso lembra que Triacastela xa era no Códice Calixtino recollida como “o final da etapa número once”.
Recoñece que cada un “é libre de elixir como fai a súa peregrinación”, pero lamenta que sexan moitas as persoas que se estean perdendo “unha das etapas máis bonitas”. A tendencia cambiou desde os anos 1990, cando o Camiño Francés era o dominador nas rutas para chegar a Santiago, ao ser escollido polo 95% dos camiñantes. Na actualidade, supón o 50% do caudal de viaxeiros que chegan á Praza do Obradoiro.
Nos últimos anos, por contra, opcións como a do Camiño Primitivo, o do Norte ou o Portugués viron multiplicadas as súas estatísticas. As cifras apuntan que a tendencia de percorrer o número imprescindible de quilómetros está en auxe e sitúase como a opción preferente para o groso de peregerinos.
O descenso de peregrinaxes de longa distancia está a afectar, sobre todo, a comunidades como Castela e León ou Aragón, e implicitamente, a concellos galegos como Triacastela.
