O Concello de Triacastela organiza unha nova edición da súa ‘Feira de Artesanía e produtos da zona’ o vindeiro sábado 26 de setembro dándolle tamén así a benvida ao outono. Ademais dos diferentes postos que abrirán ás 11:00 h, poderase gozar dunha programación moi variada na que haberá 2 presentacións literarias, unha exposición de pintura, diferentes obradoiros e moita música de rúa. O remate poñerao o cantante Antonio Barros que ofrecerá un concerto.
PROGRAMA
Ás 11:00 h, cadrando coa apertura de postos, abrirase ao público a exposición de pintura e gravado ‘Oribio’, de Ana Carballo Balboa.
A continuación, a Biblioteca Camilo José Cela acollerá dúas presentacións literarias. Ás 11:30 a do libro ‘Cuando el Camino mata’ de Pepe López Sandes; e ás 12:00 horas a presentación de ‘Entre néboas e raiolas de luz’, da triacastelá Yolanda Carballo.
Ás 12:30 recibiranse ás autoridades e ás 13:00 horas será o pregón a cargo dos nenos e nenas do CEIP Eduardo Cela Vila.
Ao longo do día haberá diferentes obradoiros: de forxa e ferrería con Jorge Eiroa, de serigrafía en soporte téxtil a cargo de “Peixesapop”, e un de arte floral. E tamén música de rúa coa charanga Louband e pandereteiras Son de Cores de Becerreá.
Xa pola tardiña, ás 19:00 h e como fin de feira, concerto de Antonio Barros.
