Este sábado, 17 de agosto, o artista e defensor dos dereitos humanos, Mohamed Said Hamdad, ofrecerá unha charla na Casa da Cultura da Pobra do Brollón a partir das 20.00. Ademais da charla, farase a proxección fotográfica, Papeles Mojados, que tratará a temática das persoas refuxiadas e emigrantes.

Mohamed Said é militante de Amnistía Internacional en España e Alxeria, e mediador intercultural con SOS Racismo Galicia.

A programación solidaria na Pobra do Brollón remata a vindeira semana coa proxección da curta documental El loco del desierto, dirixida por Julieta Cherep. Narra a historia e proxecto de Tateh Lehbib, un refuxiado saharaui que construíu un refuxio resistente ao calor e ás tormentas de area con botellas de plástico.

A proxección deste documental farase o sábado 24. Para acudir á proxección será necesario abonar unha entrada simbólica ao prezo de 2 euros. A recadación destinarase integremente a Acnur.