A conservación de grandes carnívoros en áreas de expansión: O caso do oso pardo na Serra do Courel é o título do seminario no que se teñen inscrito 25 persoas. O seminario dirixido polo catedrático da USC Antonio Rigueiro, e por Fernando Ballesteros, da Fundación Oso Pardo, inaugurararase este mércores, 4 de agosto, ás 9,00 horas.
Esta actividade constitúe un programa de carácter eminentemente práctico e cun enfoque multidisciplinar, no marco do que diversos relatores afondarán en cuestións ligadas coa recuperación e a conservación das poboacións de grandes carnívoros cando chegan a zonas de expansión nas que estiveron ausentes desde moitos anos antes.
A análise da casuística particular da expansión experimentada nos últimos anos polo oso pardo cantábrico cara a Serra do Courel, como consecuencia do crecemento continuado da súa poboación, e os retos de conservación derivados da súa presenza, así como as diversas técnicas e actuacións xa postas en marcha, son algúns dos temas para tratar no marco deste foro.
Este programa, que conta co apoio económico da Deputación Provincial de Lugo, está dirixido a habitantes das serras orientais de Lugo e de Galicia, así como a profesores e estudantes dos diversos niveis educativos e tamén a todos os profesionais implicados en tarefas de conservación da natureza, así como a todas as persoas preocupadas pola conservación do medio natural.
