A iniciativa nace dun grupo heteroxéneo de persoas residentes no rural da zona, no que converxen distintas xeracións e culturas. Trátase dun colectivo diverso, unido polas inquedanzas artísticas e polo compromiso coa dinamización cultural do territorio, que aposta por crear espazos de encontro, intercambio e creación compartida.

O Micro Aberto deste sábado é froito da colaboración entre este colectivo creativo, o artista e xestor cultural monfortino Maro Carretero, e a Cafetería Mon, que facilita o seu espazo para facer posible a actividade. A proposta combina actuacións espontáneas de música, poesía e outras disciplinas artísticas cun ambiente aberto e participativo.

Desde a organización lembran que tanto este Micro Aberto como os que se están a programar posibilitan a participación das persoas presentes. Pódese compartir unha canción, un poema, unha peza musical ou unha intervención artística. A proposta busca consolidarse como un punto de encontro cultural inclusivo, interxeracional e diverso, que contribúa a fortalecer a vida cultural da comarca desde a colaboración e a creatividade compartida.