Ao acto de entrega acudiron representantes do concello de Monforte, da Asociación de Amigos do Ferrocarril e da Deputación de Lugo, ademais da propia premiada, Isabel Pardo de Vera.
A Casa Consistorial de Monforte acolleu esta mañán a entrega do terceiro Premio Monforte al Ferrocarril outorgado pola Asociación de Amigos do Ferrocarril (AMAFER). Nesta edición, o galardón recaeu sobre Isabel Pardo de Vera, Directora Xeral do Departamento de Explotación e Construcción de ADIF.
A premiada destacou que ” trátase dun premio que me obriga aínda máis no empreño de que a provincia de Lugo dispoña da mellor conexión ferroviaria posible”. Tamén engadiu que “pódolles asegurar que farei todo o que estea da miña man para que todos os actores do cambio que precisa a rede consigan o impulso necesario, en xustiza coas esixencias da miña terra”.
Pola súa parte, o mandatario local, José Tomé Roca destacou a importancia de conceder o premio a unha muller “porque o mundo ferroviario era de homes, e eu creo que é xusto recoñecer o traballo de aquelas mulleres que dedicaron a súa vida ao ferrocarril”. Ademais, tamén declarou que, “a cidade do Cabe ten que seguir xogando un papel primordial, tanto no que se refire ao transporte de persoas, como á loxística de mercandorías polos camiños do ferro”.
PREMIO MONFORTE Al FERROCARRIL
O galardón Monforte al Ferrocarril ten carácter bianual. Na primeira edición celebrada no 2014, AMAFER rendeu homenaxe ó secretario xeral de Transportes do Ministerio de Fomento, José Luis Cachafeiro. Dous anos máis tarde, no 206, o premio foi para o ex director xeral de Mobilidade, Miguel Rodríguez Bugarín.
