Na Pobra do Brollón celebrarán o Día de Rosalía de Castro cunha obra teatral, “A pluma viva de Rosalía”, montada a partir de textos da escritora pola compañía Os Quinquilláns. O evento será o vindeiro domingo 1 de marzo ás 18:00 na Casa da Cultura ‘Olga Novo’ e a entrada é libre e gratuíta.
Na montaxe teatral, baseada nun feito real de censura a textos de Rosalía, abórdanse as dificultades ás que tivo que afrontarse unha muller escritora no seu tempo. Preténdese achegar a súa obra a tódolos públicos, particularmente a maiores de 9 anos e público adulto en xeral.
Ademais da obra teatral, o xoves 5 de marzo haberá un obradoiro de ilustración infantil sobre a figura de Rosalía de Castro a cargo de Estefanía Padullés. Está orientado ao alumnado do colexio da Pobra do Brollón pero a participación está aberta a outros e outras interesados/as. Comezará ás 11:30 na Casa da Cultura ‘Olga Novo’.
O Día de Rosalía celébrase cada 24 de febreiro e este ano cúmprense 183 do seu nacemento. Ao coincidir a data en pleno Entroido, o Concello da Pobra do Brollón decidiu aprazar uns días as actividades conmemorativas organizadas polo Concello.