A sesión terá lugar o sábado día 22 de agosto na Praza do Concello da localidade. A apertura de portas será ás 21:00 horas. A película será presentada polo seu director, Oliver Laxe ás 21:45 horas e dará comezo ás 22:00 horas.

Ao remate da proxección haberá unha charla coloquio co seu director. A película desenvólvese nunha zona rural de Galicia e aborda o problema da desaparición do medio rural por mor dos incendios forestais. O reparto está formado por actores non profesionais da serra de Ancares, e está protagonizada por Amador Arias no papel de Amador Coro, un pirómano que sae de prisión despois de ser condenado como responsable dun incendio, e Benedicta Sánchez no papel de  Benedicta, a súa nai, interpretación que a faría gañadora do premio Goya á mellor actriz revelación.

É a película máis vista en galego, con máis de 62.500 espectadores nos cinemas despois do seu lanzamento. Cine na rúa (www.cinenarua.com) nace como proxecto para promover a e difundir o cinema feito en Galicia.