“O festival faise un pouco para recuperar os sorrisos nun ano moi duro para todo o mundo”, así se sincera Roberto Lolo, o sarriano que fai posible dende hai anos que este Festival de Maxia Internacional saia adiante.
“Este ano apurouse un pouco a organización pois houbo que esperar polos permisos das autoridades sanitarias. Será unha edición atípica porque haberá menos eventos e en todos se deberán respectar as medidas sanitarias que todos e todas coñecemos: aforo limitado, distancia social, máscara e desinfección con xel hidroalcólico”, comenta tamén Lolo.
En canto aos artistas que participan este ano, destacar por exemplo que o Mago Iago de Monforte, que o pasado ano actuara por sorpresa na gala final, este ano forma parte xa do cartel; a presenza do famoso Jorge Blas e outros magos e magas como Christian Engblom que chega directamente de Finlandia, Dani Daortiz, Miguel Ángel Egea, Diana Díaz ou Jessica Guloomal. En total participarán 18 artistas, entre eles, Roberto Lolo, organizador e coordinador do evento.
O Concello de Sarria colabora como sempre, pero este ano non haberá patrocinios de comercios locais polas dificultades da situación actual, sobre todo na parte económica. Nesta edición, por primeira vez segundo nos comenta Roberto Lolo, contarase coa participación da Xunta de Galicia
Os eventos centraranse este ano na Praza da Vila, O Meigallo e a Casa da Cultura. A gala inaugural será este xoves 20 de agosto ás 22:30 h. e realizarase na Praza da Vila coa presenza estelar de Jorge Blas, que estará acompañado de Dani Polo, Jessica Goloomal e Raúl Camaguey. Se a climatoloxía non permite as actuacións neste espazo estas trasladaranse ao local social e cultural La Unión.
Programa completo do XV Festival Internacional de Maxia Vila de Sarria
GALAS
Xoves 20
17:00 h. Maxia na Residencia de Maiores.
19:30 h. Gala Infantil no Meigallo.
22:30 h. Gala Inaugural na Praza da Vila.
Venres 21
12:00 h. Conferencia para magos no Meigallo.
17:00 h. Maxia no CAPD.
20:00 h. Gala Infantil na Praza da Vila. “Todo polo sorriso dun neno/a”.
22:30 h. Gala Meigallo “Maxia no Camiño”.
Sábado 22
12:00 h. Conferencia para magos no Meigallo.
17:00 h. Gala Infantil na Praza da Vila.
19:00 e 20:20 h. Gala Maxia de preto na Casa da Cultura.
22:30 h. Gala de hipnose no Meigallo.
Domingo 23
18:00 h. Gala Infantil no Meigallo.
22:30 h. Gran Gala Final na Praza da Vila.
